Forseti Venesúela, Nicolás Maduro, er í haldi Bandaríkjamanna og mun svara til saka fyrir meint hryðjuverk sín gegn bandarísku þjóðinni eftir að honum og eiginkonu hans var rænt af Bandaríkjaher um helgina í þaulskipulögðum hernaðaraðgerðum. Þessi atburðarás hefur vakið gífurlega athygli enda gerist það ekki á hverjum degi að þjóðarleiðtogum sé rænt af heimilum sínum með hervaldi.

Maduro var mikill harðstjóri og fyrirlitinn af mörgum þegnum sínum sem hafa nú fagnað ákaft undanfarna daga. Þó nokkrir spáðu því að í framhaldinu færu fram fullkomin valdaskipti í Venesúela og að þá lægi beinast við að leiðtogi stjórnarandstöðunnar, Maria Corina Machado, tæki við sem forseti með stuðningi Donalds Trump Bandaríkjaforseta.

Machado hlaut friðarverðlaun Nóbels á þessu ári fyrir hugrekki sitt í stjórnarandstöðu gegn Maduro. Trump hafði sjálfur vonast eftir friðarverðlaununum en tók að einhverju leyti gleði sína á ný eftir að Machado tileinkaði honum verðlaun sín. Hún fagnaði svo ákaft aðgerðum Bandaríkjahers um helgina og lýsti því yfir að nú væri tími frelsisins runninn upp. Sjálf vill hún sjá Emdundo Gonzáles Urrutia sem forseta og telur að hann hafi verið rétt kjörinn í forsetakosningunum í sumar. Marudo hafi hins vegar hagrætt niðurstöðu kosninganna og neitað að láta af völdum..

Donald Trump virðist þó ekki sjá fyrir sér að Machado taki við völdum í landinu. Hún njóti ekki nægrar virðingar meðal samlanda sinna.

„Ég held það yrði erfitt fyrir hana að vera leiðtogi. Hún hefur hvorki stuðning né virðingu hjá þjóð sinni. Hún er mjög fín kona en hún nýtur ekki virðingar,“ sagði Trump.

Varaforseti Venesúela, Delcy Rodríguez, tekur við forsetaembættinu í dag. Hún hefur rétt Bandaríkjunum fram sáttahönd og segist vonast til þess að þjóðirnar tvær geti átt í farsælu samstarfi innan ramma þjóðaréttar fremur en að eiga í átökum. Trump virðist ekki vera mótfallinn því að Rodríguez taki við þar til kosningar geta farið fram, en hefur þó bent á að hún gæti hlotið sömu örlög og Maduro ef hún kyssir ekki vöndinn, enda séu það Bandaríkjamenn sem fari nú með eiginleg völd í Venesúela. Trump hefur farið fram á skilyrðislaust aðgengi Bandaríkjanna að auðlindum Venesúela, þá einkum olíunni.