Bandaríski þingmaðurinn Mike Lee hefur kallað eftir því að opinber aftaka fari fram á Tyler Robinson, sem grunaður er um morðið á áhrifavaldinum og íhaldsmanninum Charlie Kirk.

Mike er öldungadeildarþingmaður Repúblikana fyrir Utah-ríki og hefur hann gegnt þingmennsku frá árinu 2011.

„Takið Tyler Robinson af lífi. Opinberlega,“ skrifaði hann í færslu á X.

Lee lét ummælin falla eftir að ekkja Kirk, Erika Kirk, lagði fram dómsgögn á mánudag þar sem hún krafðist skjótrar málsmeðferðar og sakaði verjendur Tylers um að reyna að tefja málið.

Þetta er í annað sinn sem öldungadeildarþingmaðurinn kallar eftir því að Robinson verði tekinn af lífi opinberlega.

„Tyler Robinson tók Charlie Kirk af lífi opinberlega,“ skrifaði Lee í svipaðri færslu á X á föstudag. „Tyler Robinson ætti að vera tekinn af lífi opinberlega.“

Tyler hefur enn ekki játað eða neitað sök í málinu, en saksóknarar hafa þó gefið til kynna að þeir muni krefjast dauðarefsingar verði hann sakfelldur.

Litlar líkur eru þó á því að Mike Lee verði að ósk sinni þar sem aftökur í Utah, eða nokkru öðru ríki Bandaríkjanna, fara ekki fram opinberlega. Síðasta opinbera aftakan var gerð í Kentucky árið 1936.

Dauðarefsingar eru sjaldgæfar í Utah, en árið 2024 var 48 ára fangi, Taberon Honie, tekinn af lífi með banvænni lyfjablöndu. Þar áður, áður 2010, var Ronnie Lee Gardner leiddur fyrir aftökusveit og skotinn til bana.