Ísraelsher segist hafa fellt palestínskan vígamann sem ók mótorhjólinu sem notað var þegar Noa Argamani og kærasta hennar, Avinatan Or, var rænt af Nova-tónlistarhátíðinni 7. október 2023.
Myndskeið af ráninu fór eins og eldur í sinu um heiminn á sínum tíma og varð eitt þekktasta myndefnið frá árás Hamas á Ísrael. Þar sást Argamani sitja aftan á mótorhjóli, öskrandi af skelfingu og teygja hendurnar í átt að Or þegar þau voru flutt á brott hvort í sína áttina.
Ísraelsher og Shin Bet, öryggisþjónusta Ísraels, greindu frá því um helgina að maðurinn, Saher Nidal Latfi Sakr, hefði verið felldur í loftárás á Nuseirat-svæðinu á miðhluta Gaza. Sérsveit ísraelsku lögreglunnar, Gideonim Unit 33, kom einnig að aðgerðinni. Daily Mail segir frá þessu.
Samkvæmt Ísraelsher tók Sakr þátt í árásinni 7. október, fór yfir landamærin inn í Ísrael og ók mótorhjólinu sem notað var til að flytja Argamani og Or frá Nova-hátíðinni inn á Gaza. Herinn segir hann jafnframt hafa útvegað Hamas vopn á meðan stríðinu stóð og tengst alþjóðlegum samtökum jíhadista.
Í yfirlýsingu hersins segir að Sakr hafi að undanförnu unnið að árásum gegn ísraelskum borgurum og hermönnum.
„Hann var felldur til að eyða þeirri ógn sem af honum stafaði,“ sagði í yfirlýsingunni.
Ísraelsher birti einnig myndskeið sem hann segir sýna árásina á Sakr. Þar sést maður ganga við byggingu skömmu áður en mikil sprenging verður.
Argamani var 26 ára þegar henni var rænt en henni var bjargað úr haldi á Gaza 8. þann júní 2024, eftir 246 daga, í umfangsmikilli aðgerð ísraelskra hersveita. Avinatan Or var hins vegar áfram í haldi og var ekki sleppt fyrr en í október 2025, eftir 738 daga, ásamt öðrum gíslum samkvæmt vopnahléssamkomulagi.
