Í fyrsta sinn í 16 ár stendur til að þrír fangar verði teknir af lífi sama daginn í Bandaríkjunum. Aftökurnar eiga að fara fram í Tennessee, Alabama og Oklahoma í dag.
Þetta gerist á sama tíma og aftökum hefur fjölgað verulega í Bandaríkjunum þrátt fyrir minnkandi stuðning almennings við dauðarefsingar. Mennirnir þrír eru Anthony Darrell Hines, 66 ára, Jeremy Williams, 41 árs, og Carlos Cuesta-Rodriguez, 71 árs.
Hrottalegir glæpir
Hines á að vera tekinn af lífi í Tennessee. Hann var dæmdur fyrir morð á herbergisþernu á móteli árið 1985 en hefur haldið fram sakleysi sínu undanfarin fjögur ár. Hann er nú rúmfastur og stendur til að taka hann af lífi með banvænni lyfjablöndu.
Williams á að vera tekinn af lífi í Alabama fyrir nauðgun og morð á fimm ára stúlku árið 2021. Hann hefur sagt lögmönnum sínum upp og óskað sjálfur eftir því að dauðadómnum verði fullnægt. Kay Ivey, ríkisstjóri Alabama, hefur sagt að hún hyggist ekki veita honum náðun.
Cuesta-Rodriguez var dæmdur fyrir morð á konu árið 2003 og á að vera tekinn af lífi í Oklahoma. Hann hefur ekki óskað eftir náðun en vegna aldurs hans hafa sérfræðingar þó varað við aukinni hættu á að vandamál komi upp við aftökuna.
Aftökum fjölgar
Í frétt BBC er bent á að fyrirhugaðar aftökur mannanna þriggja endurspegli mikla fjölgun aftaka í Bandaríkjunum undanfarin ár.
Alls voru 47 fangar teknir af lífi í ellefu ríkjum árið 2025, samanborið við 25 árið áður. Fjöldinn var meira en fjórfalt meiri en árið 2021.
Flórída sker sig sérstaklega úr. Um 40 prósent allra aftaka í Bandaríkjunum árið 2025 fóru þar fram og það sem af er árinu 2026 hafa 12 af 19 aftökum landsins farið fram í ríkinu.
Sérfræðingar rekja þessa þróun að stórum hluta til Ron DeSantis, ríkisstjóra Flórída, sem hefur lengi talað fyrir dauðarefsingunni og lýst henni sem öflugu fælingartæki gegn glæpum og viðeigandi refsingu fyrir verstu afbrotamennina.
Árið 2023 var lögum í Flórída breytt þannig að ekki þarf lengur einróma niðurstöðu tólf manna kviðdóms til að mæla með dauðarefsingu. Nú nægir að átta af tólf kviðdómendum séu henni fylgjandi.
Donald Trump Bandaríkjaforseti hefur einnig lengi verið eindreginn stuðningsmaður dauðarefsingar og lýst henni sem nauðsynlegu úrræði til að refsa þeim sem fremja alvarlegustu ofbeldisglæpina.
Stuðningur minnkar
Fjölgun aftaka er athyglisverð í ljósi þess að stuðningur Bandaríkjamanna við dauðarefsingar hefur farið minnkandi.
Samkvæmt Gallup telja 52 prósent Bandaríkjamanna dauðarefsingu siðferðilega réttlætanlega, en það er lægsta hlutfall sem mælst hefur síðan á áttunda áratug síðustu aldar.
Sama þróun sést í dómssölum landsins. Á tíunda áratug síðustu aldar dæmdu kviðdómar yfir 300 manns til dauða á ári þegar mest lét. Árið 2025 voru dauðadómarnir aðeins 23.
