Þrír hælisleitendur hafa verið dæmdir til langrar fangelsisvistar fyrir að nauðga konu á strönd í Brighton á Suður-Englandi í árás sem dómari sagði hafa einkennst af miskunnarleysi og algjörri fyrirlitningu í garð brotaþolans.
Frá þessu greinir BBC.
Abdulla Ahmadi, 26 ára frá Íran, og Ibrahim Alshafe, 26 ára frá Egyptalandi, hlutu hvor um sig 21 árs fangelsisdóm. Karin Al-Danasurt, 21 árs frá Egyptalandi, var dæmdur í 18 ára og sex mánaða fangelsi. Hann tók árásina upp á myndband og var sakfelldur fyrir nauðgun sem þátttakandi í brotinu.
Allir þrír verða undir sérstöku eftirliti í sex ár að lokinni afplánun og þurfa að afplána að minnsta kosti tvo þriðju hluta dóms síns áður en þeir geta sótt um reynslulausn.
Árásin átti sér stað aðfaranótt 4. október í fyrra. Fyrir dómi kom fram að mennirnir hefðu verið á skemmtistöðum við strandlengjuna í Brighton og verið að leita sér að konum í kynferðislegum tilgangi.
Eftir að hafa yfirgefið næturklúbb hittu þeir brotaþolann á skyndibitastað. Þaðan fóru þau saman niður á ströndina þar sem árásin var framin.
Við dómsuppkvaðningu sagði Christine Henson dómari að mennirnir hefðu allir tekið þátt í árás sem hefði verið skipulögð, miskunnarlaus og sýnt algjöra fyrirlitningu í garð brotaþolans.
„Áhrifin á brotaþolann hafa verið og eru enn skelfileg. Árásin hefur haft djúpstæð, lífsbreytandi og óafturkræf áhrif á hana,“ sagði dómarinn.
Saksóknari málsins sagði fyrir dómi að konan hefði verið „leidd inn í myrkrið til að vera notuð sem kynferðislegt leikfang“.
Í yfirlýsingu sem lesin var upp fyrir dómi lýsti brotaþolinn þeim varanlegu áhrifum sem árásin hefur haft á líf hennar.
„Ef ég gæti breytt einu myndi ég fara aftur til þessarar nætur og aldrei fara út,“ sagði hún.
Hún sagðist enn sjá fyrir sér manninn sem tók árásina upp á myndband þegar hún lokaði augunum.
„Það eina sem ég sé þegar ég loka augunum er maðurinn sem var að taka þetta upp. Það eina sem ég heyri eru mávarnir, öldurnar og hláturinn sem ómar enn í höfðinu á mér.“
Dómarinn sagði að hrokafull framkoma mannanna umrætt kvöld hefði haldið áfram meðan á réttarhöldunum stóð og að þeir hefðu sýnt konunni algjöra fyrirlitningu með framferði sínu.
