Kosningabaráttan í Bandaríkjunum snýst ekki bara um pólitísk loforð og efnahagsáætlanir. Skarpur boðskapur og orð, sem eru valin af mikilli nákvæmni til að skapa umræðu og virkja kjósendur, skipta miklu máli.
Bandaríkjamenn ganga að kjörborðinu í nóvember og kjósa til þings og fleira. Það virðist stefna í að orðræðan muni gegna mikilvægu hlutverki í kosningabaráttunni.
Donald Trump og flokkssystkini hans í Repúblikanaflokknum hafa að undanförnu lagt áherslu á notkun eins ákveðins orðs þegar ráðist er að pólitískum andstæðingum.
Á nýafstöðnum leiðtogafundi NATÓ í Ankara í Tyrklandi eyddi Trump mörgum mínútum í að vara við kommúnisma sem hann lýsti sem alvarlegri ógn við Bandaríkin.
Orðið kommúnismi hefur verið fastur hluti af ræðum Trump í sumar að sögn TV2. Reuters segir að Trump hafi rætt um kommúnista rúmlega 80 sinnum á nokkrum vikum. Aðrir stjórnmálamenn úr röðum Repúblikana og íhaldsmenn eru einnig farnir að nota orðið í vaxandi mæli í opinberri umræðu.
Trump hefur meðal annars reynt að tengja Demókrata við kommúnisma og beint gagnrýni sinni að frambjóðendum sem njóta stuðnings vinstrisinnuðu samtakanna Demókratískir sósíalistar.
AP fréttastofan rannsakaði staðhæfingar Trump og segir að engir frambjóðendur bandaríska kommúnistaflokksins sitji í embættum í ríkjum landsins eða hjá alríkinu og bendir á að þekktir frambjóðendur Demókrata telji sig ekki vera kommúnista.
Stjórnmálafræðingar segja að þessi orðræða forsetans snúist ekki bara um hugmyndafræði, heldur sé þetta einnig kosningataktík.
Trump situr undir harðri gagnrýni varðandi stöðu efnahagsmála og utanríkisstefnu sinnar og hafa kjósendur miklar áhyggjur af hækkandi verði og stríðinu við Íran.
Margir sérfræðingar telja því að Repúblikanar reyni nú að beina athyglinni frá þessu og nefni því kommúnisma oft.
