Úkraínumenn og bandamenn þeirra hafa tvo mánuði til að finna friðsamlega lausn á stríðinu í Úkraínu áður en Vladímír Pútín stigmagnar stríðsreksturinn.
Þetta sagði Petr Pavel, forseti Tékklands, í samtali við The Telegraph. Forsetinn sagði að Pútín íhugi að grípa til allsherjar herkvaðningar eftir rússnesku þingkosningarnar sem fara fram 20. september.
Allsherjar herkvaðning er óvinsæl meðal rússnesku þjóðarinnar og þess vegna vill Pútín bíða þar til eftir kosningarnar.
„Ég tel að nú sé ákveðinn gluggi þar sem við getum þrýst á Rússa og sent skýr skilaboð um að við séum reiðubúin til að hefja viðræður,“ sagði Pavel sem er fyrrum yfirmaður hernaðarnefndar NATÓ og hershöfðingi í tékkneska hernum.
Hann sagðist telja að glugginn, til að finna friðsamlega lausn, verði minni eftir kosningarnar í september og þess vegna verði Úkraína og bandamenn að grípa til aðgerða nú.
„Rússar glíma við mikinn vanda og áskoranir innanlands núna. Rússneskur almenningur er í vaxandi mæli andvígur stríðinu. Ef þrýstingurinn heldur áfram og Úkraínumönnum tekst áfram að hæfa skotmörk langt inni í Rússlandi, mun Moskva væntanlega verða viljugri til samningaviðræðna,“ sagði Pavel.
Þrýstingur á Pútín
Pútín er undir þrýstingi á mörgum vígstöðvum og rússneski herinn missir hermenn í tugþúsundatali í Úkraínu.
Það er mat sérfræðinga að þeir missi 25.000 til 35.000 hermann á mánuði, þar af falli 20.000 til 25.000.
Það hefur lengi verið vitað að Rússar glíma við mönnunarvanda og Pútín hefur ekki lagt mikið á sig til að leyna þeirri staðreynd.
Í júní skrifaði hann undir enn eina tilskipunina um að fjölga hermönnum. Current Time skýrir frá þessu og segir að samkvæmt tilskipuninni eigi að vera rúmlega 1,5 milljónir hermanna.
The Kyiv Post segir að þetta hafi verið í annað sinn á nokkrum mánuðum sem Pútín neyddist til að fjölga í hernum til að vega upp á móti mannfallinu í stríðinu.
Hugsanleg árás á NATÓ
Það er ekki bara tékkneski forsetinn sem varar við hugsanlegri stigmögnun frá Pútín. Þrír heimildarmenn, sem hafa góð tengsl í Kreml, sögðu Reuter að Pútín hafi hafnað tillögum samstarfsfólks um að setjast að samningaborðinu og sé harðákveðinn í að berjast þar til hann nái þeim markmiðum sem hann sett með innrásinni.
Segja heimildarmennirnir að vel heppnaðar drónaárásir Úkraínumanna á rússneskar olíuhreinsistöðvar og hafnir hafi gert Pútín enn staðráðnari í að halda stríðsrekstrinum áfram.
Andrei Ilnitskiy, fyrrum embættismaður í rússneska varnarmálaráðuneytinu og tryggur stuðningsmaður Pútíns, sagði í júní samtali við rússneska miðilinn Kommersant að stigmögnun gæti falið í sér stórrar árásar á „30 stór iðnaðarsvæði í Úkraínu, þar á meðal stálverk og höfnina í Odesa“.
Hann sagði einnig að annað skref í stigmögnun gæti verið árás á herstöðvar NATÓ í Eystrasaltsríkjunum og Rúmeníu og evrópskar verksmiðjur sem framleiða dróna og flugskeyti fyrir Úkraínu.
Óttast að missa völdin
Pútín hefur hafnað boði Volodymyr Zelenskyy, forseta Úkraínu, um fund og vopnahlé og því erfitt að sjá að mikill friðarvilji hrjái hann.
Bresk-bandaríski andspillingaraðgerðasinninni Bill Browder, sem var eitt sinn forstjóri stærsta rússneska fjárfestingarsjóðsins, þekkir mjög vel til Pútíns og stöðunnar í Rússlandi og segir hann að ekki sé að sjá að Pútín vilji semja um frið.
„Ef Pútín semur um frið þá missir hann völdin. Ef hann missir völdin þá verður hann hengdur upp í ljósastaur,“ sagði Browder í hlaðvarpinu „World of Trouble“.
Pútín hefur allt frá 2014 sagt að ráðist hafi verið inn í Úkraínu vegna ógnar frá NATÓ, þjáninga rússneska minnihlutans í Donbas og óskarinnar um að Úkraína verði hluti af endurreistu rússnesku keisaradæmi.
Browder segir að þetta sé ekki rétt því ástæðan fyrir innrásinni sé að Pútín haldi örvæntingarhaldi í völdin. Hann hafi áttað sig á að hann hafi stolið allt of miklum peningum frá rússneska ríkinu en þeir hafi runnið til hans sjálfs og elítunnar í Kreml.
„Pútín og þúsund manns, sem standa honum næst, hafa stolið 1.000 milljörðum dollara frá rússneska ríkinu. Ástæðan fyrir slæmum lífskjörum rússnesks almennings eru að það hefði átt að nota þessa peninga í skólakerfið, sjúkrahús, vegi og opinbera þjónustu. Þess í stað voru þeir notaði í einkaflugvélar, snekkjur og glæsihýsi í suðurhluta Frakklands,“ sagði Browder.
Hann sagði einnig að Pútín óttist að almenningur muni storma að Kreml ef hann velur friðarleiðina og lætur undan kröfum Vesturlanda.
