Heilbrigðisyfirvöld um allan heim hafa árum saman lagt áherslu á að það sé mikilvægt að hreyfa sig daglega. Alþjóðaheilbrigðismálastofnunin WHO hefur bent á að regluleg hreyfing geti hjálpað til við að viðhalda hreyfigetunni og koma í veg fyrir sjúkdóma og á þetta einnig við hjá eldra fólki.
WHO leggur einnig áherslu á að það þurfi að miða ráðleggingar um hreyfingu við hvern og einn einstakling út frá til dæmis aldri, heilsufari og hreyfigetu.
Hjá mörgu eldra fólki er hreyfingin aðallega göngutúrar, verslunarferðir og hreyfing innan veggja heimilisins. Þessi hversdagslega hreyfing gegnir mikilvægu hlutverki því hún er raunhæf og það er hægt að halda sig við hana í langan tíma.
Medonet segir að almennt séu gönguferðir taldar góð og viðeigandi hreyfing fyrir fólk yfir sextugu. Gönguferðir reyna ekki mikið á liðina og það er hægt að flétta þær inn í daglega rútínu.
Í bandarískri rannsókn, sem var birt 2022 í vísindaritinu The Lancet Public Health, var fylgst með um 50.000 fullorðnum til að rannsaka tengslin á milli skrefafjölda og heilbrigðis.
Niðurstaðan var að mikil hreyfing var ekki endilega ávísun á auka heilsufarsávinning fyrir eldra fólk.
Einnig kemur fram í rannsókninni að of mikil hreyfing geti í sumum tilfellum tengst aukinni hættu á líkamlegum vandamálum.
Fyrir fólk sextugt og eldra er mælt með 6.000 til 8.000 skrefum á dag sem hæfilegri hreyfingu.
Mælt er með meiri skrefafjölda fyrir yngra fólk og WHO ráðleggur fólki, sem glímir við heilsufarsvanda, að ganga um 5.500 skref á dag.
Markmiðið er ekki að ná ákveðinni tölu, heldur að halda sig við reglulega hreyfingu sem styrkir heilsuna og lífsgæðin til lengri tíma litið
