Margir eru rétthentir en færri eru örvhentir. En af hverju eru sumir rétthentir og aðrir örvhentir? Hvað ræður þessu?
Vísindamenn við University of Californa rannsökuðu þetta og beindu sjónum sínum að heilbrigðu fullorðnu fólki og fengu það til að gera ýmis verkefni með báðum höndum.
Meðal þess sem þátttakendurnir voru látnir gera var að reyna að hæfa skotmark með ýmsum aðferðum. Til dæmis á þann hátt sem var fólkinu eðlilegur, með því að vera með auka þyngd og með því að nota hlut sem kallaði á mikla nákvæmni.
Hreyfingarnar voru mældar með sérstökum búnaði að því er segir í rannsókninni sem hefur verið birt í Proceedings of the National Academy of Sciences.
Í ljós kom að nær enginn munur var á hvort fólk notaði hægri eða vinstri höndina þegar það tókst á við auðveld verkefni.
En þegar verkefnin urðu erfiðari gekk fólkinu betur að leysa þau ef það notaði höndina sem það notar mest.
Því næst var fólkið beðið um að skrifa með bæði höndum og olnbogum. Enginn munur var á milli hægri og vinstri olnboga í þessu verkefni því engin þátttakendanna hafði áður prófað að skrifa með olnbogunum.
Eftir svolitla þjálfun urðu báðir olnbogarnir betri og var bætingin sú sama hjá báðum og gerðist jafn hratt.
Vísindamennirnir segja að þetta bendi til að æfing gegni mikilvægu hlutverki varðandi það hversu góður handleggur verður í ákveðnum hreyfingum.
Vísindamenn hafa lengi talið að hið ráðandi heilahvel væri mikilvægasta skýringin á af hverju fólk verður rétthent eða örvhent.
Fyrri rannsóknir höfðu einnig sýnt fram á valið á milli handanna getur átt sér stað áður en barn fæðist.
En nýja rannsóknin bendir til að munurinn á milli hægri og vinstri handar þróist með margra ára æfingu og notkun.
Vísindamennirnir telja að þessi þekking geti hjálpað til við að bæta endurhæfingu þeirra sem þurfa að læra að hreyfa sig á nýjan leik, til dæmis eftir heilablóðfall eða heilaskaða.
