Eftir rúmlega fjögurra ára stríðsrekstur í Úkraínu sýnir rússneskt efnahagslíf sífellt fleiri merki þess að alvarleg vandamál séu til staðar. Margir sérfræðingar segja að landið sé að ná þolmörkum þess hversu lengi það getur haldið stríðsrekstrinum áfram án þess að það hafi alvarlegar afleiðingar fyrir efnahagslíf landsins.
Þetta kemur fram í umfjöllun Børsen sem segir að vísindamenn við Kiel Institute for the World Economy segi að nú sé afgerandi stund að renna upp fyrir Rússland.
Í skýrslu þeirra segir að merkin um að stríðsefnahagur Rússlands nálgist hrun verði sífellt skýrari. Þeir benda einnig á að lítill hagvöxtur sé í landinu og að um 40% opinberra útgjalda fari nú til hersins.
Breska hugveitan International Institute for Strategic Studies segir að staðan sé þannig að efnahagskerfi landsins keyri á tveimur hraðastillingum.
Erlend Bjørtvedt, fyrrum stjórnarerindreki og sérfræðingur í rússneskum málefnum, benti á að rússneskt efnahagslíf sé mjög viðkvæmt. „Rússneska efnahagslífið er einfaldlega við það að hrynja saman,“ sagði hann.
Sérfræðingar segja að rússnesk stjórnvöld geti neyðst til að skera opinber útgjöld niður eða afla meira fjár með aukinni skattheimtu og lántöku.
Sérfræðingar hjá hugveitunni Center for European Policy Analysis telja að Rússar séu að verða búnir með varasjóði sína en þeir hafa haldið stríðsefnahagnum gangandi. Segja sérfræðingarnir að Rússar geti ekki fjármagnað stríðsreksturinn, haldið verðbólgunni niðri og um leið tryggt hagvöxt.
