Evrópa er orðin öruggari en áður en samt sem áður telja álfubúar að glæpatíðnin hafi aukist.
Á pappírunum ætti Evrópubúum að finnast þeir öruggari en áður. Glæpatíðnin hefur lækkað frá því á tíunda áratug síðustu aldar og Vestur-Evrópa er miklu öruggari í dag en í lok níunda og tíunda áratugarins þegar miðað er við klassíska tölfræði yfir afbrotatíðni. The Guardian skýrir frá þessu og vísar í tölur frá Eurostat, tölfræðistofnun Evrópusambandsins.
En þrátt fyrir þetta er tilfinningin hjá Evrópubúum sú að glæpatíðnin hafi aukist.
Sem dæmi má nefna að á Ítalíu telja 80% landsmanna að glæpatíðnin hafi aukist. Í Danmörku segja 53% að þeir telji að glæpatíðnin hafi aukist þrátt fyrir að tölfræðin sýni annað. Þetta kom fram í könnun sem YouGov gerði.
Í afbrotafræði er til nafn yfir þessa mótsögn, þetta kallast „öryggisgatið“. Þetta lýsir bilinu á milli minnkandi glæpatíðni og ótta sem er ekki endilega á rökum reistur.
Óttinn við afbrot verður ekki til í einhverju tómarúmi. Hann tengist víðtækari ótta við öryggisleysi í Evrópu, þar sem stríðið í Úkraínu, ógnin frá Rússlandi og efinn um öryggi Evrópu eru fyrirferðarmeiri en áður.
