Við vitum öll að Ísland er þekkt út um allan heim sem land jarðvarmans, land hveranna og heitra lauga. En fáum hefur eflaust dottið í hug að slíkar auðlindir sé að finna á Grænlandi.
Kortlagning á heitum lindum á Grænlandi stendur yfir og er hún gerð í samvinnu grænlensku náttúrufræðistofnunarinnar, Kaupmannahafnarháskóla og dönsk/grænlensku jarðfræðistofnunarinnar.
Vísindamennirnir hafa nú þegar aflað upplýsinga um 382 heitar uppsprettur á Grænlandi að sögn Ritzau.
Heitu lindirnar geta haft áhrif á ferðamannaiðnaðinn og hugsanlega orðið hitagjafi eins og hér á landi segir í fréttatilkynningu frá vísindamönnunum sem vinna að rannsókninni. Þeir segja að þeir hafi safnað saman upplýsingum og vitneskju sem hafi fram að þessu verið á víð og dreif í allt að 100 ára gömlum gögnum.
Þetta er allt frá gömlum leiðangurslýsingum, gróðurrannsóknum til gervihnattarmynda og staðarnafna á borð við Uunartoq og Puilasow sem þýða „heit lind“, og „lind“ sagði Eva Bendix Nielsen, aðalhöfundur rannsóknarinnar.
Ein þekktasta heita lindin á Grænlandi er Uunartoq-lindin sem er í suðurhluta landsins. Þar er vatnið 38 til 40 gráður og myndar hratt náttúrulegar laugar þar sem hægt er að baða sig. Svæðið er vinsælt meðal heimamanna og ferðamanna.
