Skipið var þá á siglingu um austanvert Miðjarðarhaf í tengslum við átökin í Miðausturlöndum.
Sjóliðinn notaði snjallúrið sitt til að mæla 5 km hlaupatúr sinn, sem tók 35 mínútur, og birti á Strava að sögn Le Monde.
Blaðið staðfesti þetta með því að skoða gervihnattarmyndir, sem voru teknar skömmu eftir að sjóliðinn lauk æfingu sinni, og sást skipið þá norðvestan við Kýpur.
Yfirstjórn franska hersins sagði að það væri brot á reglum að nota app á borð við þetta þegar hermenn eru við skyldustörf.
Le Monde segir að annar sjóliði, á öðru frönsku herskipi, hafi einnig komið upp um staðsetningu þess með notkun líkamsræktarapps.
Charles de Gaulle flugmóðurskipið er flaggskip franska flotans og eina kjarnorkuknúna flugmóðurskipið í eigu annarra en Bandaríkjamanna.
