„Það eru liðin meira en tuttugu ár síðan Daniel var tekinn frá okkur, og á hverjum einasta degi síðan þá höfum við barist fyrir því að engin önnur fjölskylda þurfi að ganga í gegnum það sem við gerðum,“ sögðu foreldrar Daniels, Bruce og Denise Morcombe, í yfirlýsingu í vikunni.
„Lög Daniels snúast um að vernda börn, styrkja foreldra og varpa ljósi á þá sem leynast í myrkrinu. Við erum ótrúlega stolt að sjá að arfleifð Daniels sé svo öflug og muni halda börnum í Queensland öruggum um ókomin ár,“ bættu þau við.
Samkvæmt frétt News.com.au munu foreldrar í Queensland geta óskað eftir aðgangi að lista yfir dæmda barnaníðinga. Á listanum verða birtar myndir og upplýsingar um brotamennina, þar á meðal persónueinkenni eins og húðflúr.
Skráin mun innihalda leitarvél þar sem hægt verður að sjá hvort svokallaðir há-áhættubrotamenn búi í nágrenninu. Notendur þurfa að samþykkja ákveðin skilyrði til að fá aðgang að skránni, meðal annars að misnota ekki upplýsingarnar. Þeir sem brjóta gegn skilmálunum geta átt von á refsingu.
Daniel var 13 ára þegar hann var numinn á brott þann 7. desember 2003 á leið í verslunarmiðstöð til að kaupa jólagjöf fyrir foreldra sína. Líkamsleifar hans fundust ekki fyrr en árið 2011, og var Brett Peter Cowan handtekinn sama ár.
Eftir morðið á syni sínum stofnuðu Bruce og Denise Daniel Morcombe Foundation, sem vinnur að fræðslu og forvörnum gegn barnaníði og ofbeldi. Þau hafa síðan barist fyrir breytingum á löggjöf um kynferðisbrotamenn og auknum stuðningi við fjölskyldur fórnarlamba slíkra brota.
Markmið hinna nýju laga er að tryggja að foreldrar hafi betri upplýsingar og yfirsýn yfir þær hættur sem geta leynst í þeirra nánasta umhverfi.
