Vinsæll rappari gaf sig fram við lögregluna í Malasíu í síðustu viku eftir að áhrifavaldur fannst látinn í baðkari á hótelherbergi í Kuala Lumpur. Rapparinn er betur þekktur sem Namewee en heitir réttu nafni Wee Meng Chee. Hann gaf sig fram eftir að hann hlaut stöðu sakbornings í málinu og var úrskurðaður í nokkra daga gæsluvarðhald áður en hann var látinn laus gegn tryggingu.

Hin látna heitir Iris Hsieh en hún var 31 árs áhrifavaldur frá Taívan. Aðdáendur hennar þekktu hana sem Hsieh Yu-hsin, eða „hjúkkugyðjuna“, og var hún stödd í Malasíu til að ræða við Namwee um auglýsingu sem hann hafði samþykkt að leikstýra. Þann 22. október fannst hún látin í baðkari og til að byrja með var talið að hún hefði látist af slysförum en nú er málið rannsakað sem manndráp. Talið er að Namewee hafi verið sá seinasti sem sá áhrifavaldinn á lífi.

Rapparinn neitar sök í málinu og sagði í færslu á Instagram að sannleikurinn verði leiddur fram í málinu og muni tala sínu máli. Það var Namewee sem tilkynnti andlátið til lögreglu en hann segist hafa komið að Hsieh látinni. Á hótelherberginu fundust níu töflur sem eru taldar vera fíkniefnið alsæla. Það mun þó ekki hjálpa rapparanum í málinu að hann hafi þvertekið fyrir að nota fíkniefni því nokkur slík mældust í blóði hans í sýnatöku, þar með talið amfetamín, metamfetamín, ketamín og kannabis.

Namewee hefur getið sér gott orð sem rappari, leikari og kvikmyndagerðamaður og nýtur mikilla vinsælda í Kína og Taívan. Hann var þó útilokaður í Kína árið 2021 eftir að hann samdi lag þar sem hann hæddist að kínverskum þjóðernissinnum. Tónlist hans hafði þó áður komið honum í vandræði. Árið 2007 gaf hann út lag þar sem hann gerði grínútgáfu af þjóðsöng Malasíu með frekar grófum texta og árið 2016 endaði hann í nokkurra daga fangelsi fyrir að móðga íslamstrú, opinber trúarbrögð Malasíu, með myndbandi sem hann tók upp í mosku. Árið 2018 var hann aftur handtekinn fyrir að móðga trúna með tónlistarmyndbandi.