Kjörhitastig í svefnherbergi er 17 til 18 gráður hið minnsta allan sólarhringinn. Ef hitinn í því verður meira en 5 gráðum lægri en í öðrum rýmum hússins er hætta á að raki myndist á yfirborðsflötum í herberginu þegar hlýtt loft úr öðrum rýmum leitar inn í herbergið. Þetta gerist einnig þótt dyrnar inn í svefnherbergið séu lokaðar.
Um leið og raki og lífræn efni, til dæmis ryk, veggfóður eða tré, eiga samleið í svefnherberginu getur myglusveppur myndast og dafnað.
Það er samt óhætt að lækka hitann í svefherberginu niður fyrir fyrrnefndar 17 til 18 gráður ef hitamunurinn miðað við önnur rými er ekki meira en 5 gráður. Þá er ekki hætta á að myglusveppur nái sér á strik. En það þarf að muna að hækka hitann í herberginu þegar farið er á fætur.
Lækkaðu hitann á nóttunni og hækkaðu hann aftur þegar þú ferð á fætur.
Loftaðu út fyrir svefninn. Það er í lagi að lækka hitann þegar gengið er til náða. Þegar þú hefur lækkað hitann á ofninum ættirðu að lofta út í 5 til 10 mínútur.
Það er í lagi að sofa við opinn glugga svo lengi sem það er ekki alltof kalt úti. Ef þú sefur með opinn glugga kælir þú ekki bara loftið í herberginu niður heldur einnig yfirborðsfleti. Af þeim sökum er mikilvægt að hita herbergið upp yfir daginn.
Loftaðu út á hverjum morgni. Það er mikilvægt að lofta út á morgnana til að losna við rakt loft úr herberginu, sérstaklega ef þú sefur með lokaða glugga. Að útloftun lokinni er best að hækka hitann aftur.
Ekki láta húsgögn vera alveg upp við útvegg ef hann er illa einangraður. Það er gott að hafa um 10 sm frá til dæmis rúmi eða skáp að útvegg. Þannig kemst ferskt loft að veggnum og dregur úr hættunni á að myglusveppur myndist.
Þurrkaðu raka af yfirborðsflötum á morgnana, þar á meðal úr rúðunum.
