Dularfullur hitasjúkdómur hefur orðið að minnsta kosti 11 manns að bana í sjö þorpum í Kutch-héraðinu í Gujarat-ríki á Indlandi. Heilbrigðisyfirvöld hafa útilokað fjölda þekktra veira sem ástæðu sjúkdómsins.

Hindustian Times og The Times of India eru meðal þeirra miðla sem skýra frá þessu.

Segja miðlarnir að mörg börn séu meðal hinna látnu og að 48 ný smittilfelli hafi greinst á svæðinu.

Rushikesh Patel, heilbrigðisráðherra ríkisins, sagði að eftir að fólk smitist þá nái hitinn mjög hættulegu stigi á fimm til sjö dögum og að svo virðist sem þeir hafa látist hafi ekki leitað til læknis fyrr það var um seinan. Hann hvatti fólk til að hunsa ekki sjúkdómseinkennin og leita strax til læknis.

Sjúkdómseinkennin eru hiti, kuldahrollur, hósti og innan nokkurra klukkustunda frá smiti einkenni lungnabólgu, öndunarörðugleikar og nokkrum dögum síðar byrja líffærin að gefa sig.

Í fyrstu var talið að lungnabólga væri það sem veldur þessu en heilbrigðisyfirvöld hafa nú útilokað það. Yfirvöld telja að tengsl séu á milli sjúkdómsins og að á síðustu mánuðum hefur verið mikil úrkoma á svæðinu og mikil flóð hafa fylgt í kjölfarið.

Rannsakað hefur verið hvort sjúkdómurinn sé af völdum fuglainflúensu, svínainflúensu, malaríu og fleiri þekktra veira en svo er ekki. Heilbrigðisyfirvöld segja að ekki sé heldur um sjúkdóm að ræða sem hafi smitast frá dýrum í fólk.

50 læknateymi hafa verið send til svæðisins og 100 einangrunarsjúkrarúmum hefur verið komið upp og 30 öndunarvélar hafa verið fluttar á svæðið.