Kim Jong Un, leiðtogi Norður-Kóreu, segir að yfirvöld þar í landi vinni nú að því að endurskipuleggja stefnu sína þegar kemur að kjarnorkuvopnum. Markmiðið sé að margfalda fjölda þeirra kjarnavopna sem landið hefur yfir að ráða.

Ríkisfjölmiðill Norður-Kóreu, KCNA, greindi frá þessu í morgun.

Þjóðhátíðardagur Norður-Kóreu var haldinn í gær en þá voru 76 ár liðin síðan ríkið fékk sjálfstæði. Í ræðu sem Kim hélt í tilefni af hátíðarhöldunum sagði hann að Norður-Kóreumenn þyrftu að vera við öllu búnir til að tryggja öryggi landsins og liður í því væri að stækka vopnabúrið.

Kim nefndi sérstaklega ógn frá Bandaríkjunum og bandaþjóðum þeirra í álfunni.