Dómarinn sagði málið „vandræðalegt“ og „óvenjulegt“ þegar hann kvað upp úrskurð sinn. Málið snýst um að maður einn krafðist þess að fá að eiga samskipti við tvíburasyni sína. En fyrrum unnusta hans, sem hann segir móður drengjanna, sagðist aldrei hafa eignast tvíbura og ekki heldur eitt barn.

Maðurinn sagðist vera faðir tvíburadrengja sem búi hjá móður sinni eða fjölskyldu hennar en að þau hafi falið drengina fyrir honum og samfélaginu frá fæðingu.

Maðurinn sagði að konan hafi sagt honum að hún væri barnshafandi og hefði farið til ljósmóður og að hún hefði sagt honum frá þyngd drengjanna eftir fæðingu þeirra og að þeir líktust honum.

En konan sagði dómstólnum í Lundúnum að hún hafi aldrei verið barnshafandi og að maðurinn hafi skáldað þetta til að „hefna“ sína á henni eftir að hún kærði ættingja hans til lögreglunnar.

Hún sagði að á meðan á sambandi þeirra stóð hafi hann verið stjórnsamur og hafi þvingað hana til eins og annars.

Sky News segir að dómarinn, Emma Arbuthnot, hafi sagt málið „vandræðalegt“ og „óvenjulegt“ og að „henni fyndist hún hafa rambað inn í annan veruleika“ á meðan á málsmeðferðinni stóð.

Í dómsniðurstöðunni sagði hún að „sterkar sannanir“ væru fyrir að konan hefði verið barnshafandi og að „hún hefði viljað leyna því“ og að „ákveðnar sannanir væru fyrir að minnsta kosti eitt barn hefði fæðst“.

En hún sagði einnig að „ónægar sannanir“ væru fyrir því að konan hefði eignast tvíbura og að „hún geti ekki sagt“ hvar barnið sé núna.

„Þetta er óvenjulegt mál því annað hvort maðurinn eða konan hafa logið um þungunina og fæðingu barnanna í þrjú ár. Lygar annars þeirra hafa verið flóknar, viðvarandi og mjög vel undirbúnar og framkvæmdar,“ skrifaði hún í úrskurðinum.

Vitni sagðist hafa séð konuna þegar hún var barnshafandi og hafi síðar séð hana með barn í bíl.

En ekkert fannst í opinberum skrám um að konan hefði eignast barn eða börn.

Maðurinn sagði að konan hafi sýnt honum myndir, niðurstöður ómskoðunar og önnur skjöl varðandi þungunina og fæðinguna.

Heimilislæknir konunnar hafði engar upplýsingar um að hún hafi verið þunguð en dómarinn sagði að gögn sýni að konan hafi haft samband við einkasjúkrahús til að spyrjast fyrir um eitt og annað tengt þungun og fæðingu. Einnig sagði dómarinn í niðurstöðu sinni að konan hafi farið fram á að læknaskýrslur hennar yrðu ekki geymdar hjá hinu opinbera heilbrigðiskerfi og að það hafi verið hluti af tilraunum hennar til að „leyna þungun“.