Vísindamenn hafa fundið neðansjávarhitasvæði á miklu dýpi við Svalbarða. Þetta kom mjög á óvart því talið var að svæðið vværi „dautt“ jarðfræðilega séð.

Live Science skýrir frá þessu og segir að um tvö svæði sé að ræða þar sem eru einhverskonar ventlar þar sem heitt vatn streymir út í sjóinn sem og dularfullir málmar. Ventlarnir eru á 3 km dýpi suðvestan við Svalbarða.

Ventlarnir hafa fengið nöfn og eru þau sótt í norræna goðafræði. Það er engin tilviljun því svæðið sem þeir eru á heitir „Jötnar“ en það er um 1 km á lengd og 200 metrar á breidd. Þar eru bæði virkir og óvirkir ventlar.

Einn stærsti ventillinn, sem er með marga strompa og greinar, hefur fengið nafnið Yggdrasill en það er nafnið á lífsins tré í norrænni goðafræði.  Annar ventill hefur fengið nafnið Níðhöggur sem var dreki í höggormslíki sem bjó í Yggdrasil og nagaði rætur trésins.

Niðurstaða rannsóknarinnar hefur verið birt í vísindaritinu Scientific Reports.