Live Science skýrir frá þessu og segir að 21 par heilbrigðra eineggja tvíbura hafi tekið þátt í rannsókninni. Annar tvíburinn, í hverju pari, borðaði grænmetisfæði á meðan hinn borðaði fjölbreyttan mat sem innihélt grænmeti, kjöt, egg og mjólkurvörur. Þeir héldu sig við þetta mataræði í átta vikur.
Ástæðan fyrir því að eineggja tvíburar voru notaðir í rannsókninni er að þar sem erfðaefni þeirra er hið sama, þá er auðveldara að einangra áhrif mataræðis sem geri rannsóknina auðveldari.
Tvíburarnir voru um fertugt að meðaltali og aðallega konur. Þeir borðuðu mat, sem vísindamennirnir útbjuggu fyrir þá, fyrstu fjórar vikurnar. Síðari fjórar vikurnar sáu þeir sjálfir um eldamennskuna eftir að hafa sótt kennslu í næringarfræði.
Vísindamennirnir rannsökuðu blóð tvíburanna þegar rannsóknin hófst, eftir fjórar vikur og þegar henni lauk.
Eftir átta vikur höfðu orðið markverðar breytingar á DNA metelýringu þeirra sem borðuðu grænmetisfæði. En hjá þeim sem borðuðu ekki eingöngu grænmetisfæði höfðu engar breytingar orðið.
Breytingar á metelýringu hafa verið tengdar við hversu hratt öldrun á sér stað. Vísindamenn hafa áður rannsakað þessar breytingar til að búa til „klukkur“ sem sýna hámarksævilengd lífvera.
Rannsóknin hefur verið birt í vísindaritinu BMC Medicine.
