Banvæn ofurbaktería, sem verður um 300.000 manns að bana árlega, þróaðist út frá venjulegri bakteríu, sem er að finna í umhverfinu, og gekk þessi þróun hratt fyrir sig. Á rétt rúmum tveimur öldum varð þessi baktería eins banvæn og hún er í dag.

Þetta eru niðurstöður nýrrar rannsóknar og gætu þær hjálpað okkur að bæta þekkingu okkar á hvernig er hægt að mynda ónæmi gagnvart bakteríum. Live Science skýrir frá þessu.

Fram kemur að bakterían Pseudomonas aeruginosa geti valdið sýkingum, sem eru ónæmar fyrir sýklalyfjum, sérstaklega hjá fólki með undirliggjandi sjúkdóma á borð við slímseigjusjúkdóm og lungnaskemmdir af völdum reykinga.

En þessi baktería hefur ekki alltaf verið sérhæfð manndrápsbaktería.

Vísindamenn við Cambridge háskóla rannsökuðu tæplega 10.000 DNA-sýni sem voru sýkt af bakteríunni. Þau komu alls staðar að úr heiminum. Út frá þessu gátu þeir byggt upp „ættartré“ bakteríunnar og komust þá að því að 21 „grein“ af „ættartrénu“ veldur sjö af hverjum tíu sýkingum í fólki. Þessi afbrigði bakteríunnar þróuðust hratt og dreifðu sér um heiminn á um 200 árum.

Sum afbrigðanna hafa fundið aðferð til að notfæra sér erfðagalla í fólki, sem þjáist af slímseigjusjúkdómi, sem gerði þeim kleift að lifa af í ónæmisfrumum sem nefnast átfrumur.

Vísindamenn grunar að þessi hraða útbreiðsla bakteríunnar hafi verið möguleg þar sem fólk fór í sífellt meir mæli að búa í fjölmennum borgum síðustu tvær aldirnar og vegna loftmengunar sem gerir lungu fólks móttækilegri fyrir sýkingum.