Að auki hafa nýjar reglur tekið gildi um klæðaburð, foreldrasamtöl við ungmenni sem stunda kynlíf og svo auðvitað fyrrgreind regla um að heimsækja skuli útskúfaða.
Ekstra Bladet segir að fleiri reglur hafi einnig verið kynntar meðlimum um allan heim en þær koma frá hinu svokallaða „stýriráði“ í Bandaríkjunum en það er hið ráðandi vald hjá Vottum Jehóva. „Jehóva vill gjarnan að þeir útskúfuðu taki sönsum og sleppi úr gildru djöfulsins,“ segir Mark Sanderson, einn meðlima „stýriráðsins“ í myndbandi sem var birt á heimasíðu safnaðarins.
Ráðið segir að nýju reglurnar séu tilkomnar vegna þess að í bænum, rannsóknum, hugleiðslu og umræðum ráðsins hafi það íhugað hvernig sé hægt að sýna þeim sem hafa framið „alvarleg afbrot“ „miskunn Jehóva“.
„Útskúfaðir“ meðlimir eru þeir sem hafa yfirgefið söfnuðinn, af eigin hvötum eða þá verið reknir. Nú eiga háttsettir meðlimir í hverri safnaðareiningu að heimsækja þetta fólk, biðja með því og hvetja það með kærleika til að snúa aftur í söfnuðinn.
Þessar nýju reglur ná til þeirra sem hafa yfirgefið Vottana nýlega sem og þá sem voru útilokaðir frá söfnuðinum fyrir mörgum árum síðan.
Samkvæmt gömlu reglunum þá máttu safnaðarmeðlimir ekki eiga nein samskipti við útskúfaða. Þeir máttu í raun ekki segja „hæ“ við þá, ekki einu sinni þótt um barn viðkomandi safnaðarmeðlims væri að ræða, systkini eða foreldra. En með nýju reglunum er opnað á að það má heilsa útskúfuðum stuttlega. „Við viljum auðvitað ekki að um langt samtal eða samveru sé að ræða með útskúfuðum, en við þurfum heldur ekki að hunsa þau alveg,“ segir stýriráðið.
Ef skírðir meðlimir Votta Jehóva, sem eru yngri en 18 ára, gerast sekir um „siðleysi“ eiga þeir á hættu að verða reknir úr söfnuðinum. Siðleysi getur verið að eignast kærasta/kærustu, samkynhneigð, kynlíf utan hjónabands, daður, að kyssast, að horfa á klám og að stunda sjálfsfróun. Með nýju reglunum fær unga fólkið nú auka tækifæri til að „iðrast“ og breyta hegðun sinni áður en til tals kemur að reka það úr söfnuðinum.
