Vísindamenn hafa fundið marga gamla skó um allan heim. Þeirra á meðal er 5.500 ára gamall leðurskór sem fannst í Armeníu, 6.200 ára gamlir grassandalar sem fundust á Spáni og 8.300 ára gamall fótabúnaður sem fannst í Missouri.

En hvenær fundu menn upp skó?

Á vef Live Science segir að það sé erfitt að svara þessari spurningu því dýrahúð, plöntutrefjar og annað sem er notað til að búa til skó brotni niður með tímanum. Elstu þekktu skórnir eru rúmlega 10.000 ára en miðað við steingerð fótspor þá getur vel hugsast að forfeður okkar hafi verið farnir að nota skó mun fyrr.

Elstu skórnir sem vísindamenn hafa aldursgreint er par af 10.400 ára gömlum sandölum sem fannst í Fort Rock Cave í miðhluta Oregon í Bandaríkjunum.

Þegar fornleifafræðingar hófust handa við uppgröft í Fort Rock Cave 1938 fundu þeir tugi sandala sem voru ofnir úr berki og fleiru. Svipaður fótabúnaður hefur fundist á tæplega tíu stöðum í norður og vestur Great Basin, sem er svæðið á milli Sierra Nevada og Klettafjalla. Þessir skór eru almennt vel gerðir, með flötum sóla og hlíf yfir fótinn.

Þetta eru elstu þekktu skórnir en ekki er útilokað að menn hafi notað skó miklu fyrr. Steingerð fótspor á strönd í Suður-Afríku gætu verið eftir skó en þau eru allt að 150.000 ára gömul samkvæmt niðurstöðu rannsóknar frá 2023.