Lam Kang hafði tamið sér heilbrigðan og agaðan lífsstíl en hann lést skyndilega af völdum hjartaáfalls og er óhætt að segja að það hafi komið fjölskyldu hans algjörlega í opna skjöldu. Hún áttaði sig ekki á hvernig það gat orðið svona brátt um mann sem hafði tamið sér mjög heilbrigðan lífsstíl. Hann var fyrirmynd barnanna sinna þegar kom að heilbrigði.
Sanook skýrir frá þessu og segir að Lam Kang hafi farið á fætur klukkan fjögur á hverjum morgni til að fara út að hlaupa. Að því loknu hafi hann fengið sér heimagerðan mat og hafi hann alltaf gætt þess að borða ekki mat sem innihélt rotvarnarefni. Þess utan borðaði hann mikið af ávöxtum og grænmeti.
Þegar læknar ræddu við fjölskylduna eftir andlát hans áttaði hún sig á að hlaupin svona snemma að morgni gætu hafa verið allt annað en góð fyrir heilsufar hans.
Læknarnir sögðu þeim að hlaupatúrar svona snemma á morgnana geti valdið því að æðarnar dragist saman en það veldur skyndilegri hækkun á blóðþrýstingnum. Þetta er mjög hættulegt fyrir fólk sem glímir við leyndan heilsufarsvanda.
Læknarnir sögðu fjölskyldunni að til að forðast að svona lagað gerist þurfi eldra fólk að hafa í huga að stunda hreyfingu þegar hlýrra er en snemma að morgni og að leggja áherslu á hreyfingu með hæfilegri ákefð, til dæmis rólega göngu, frekar en hlaup sem reyna mjög á.
Þeir sögðu einnig að það sé mikilvægt að mataræðið sé þannig að fólk fái næga næringu, sérstaklega holl fituefni sem geta verndað æðarnar.
Einnig er mikilvægt að fara reglulega í heilsufarsskoðun svo hægt sé að koma auga á heilsufarsvanda og takast á við hann í tíma.
