Sjónvarpsmaðurinn John Oliver átti erfitt með að halda aftur að tárunum í gær þegar hann hvatti áhorfendur til að koma í veg fyrir að Donald Trump verði aftur forseti. Oliver lýsti yfir stuðningi við Kamala Harris os sagði við áhorfendur:

„Kosningar einar og sér duga ekki til að ná fram stórfelldum breytingum, en þær eru nauðsynlegar ef slíkt á að eiga sér stað. Því kjördagur er dagurinn þar sem þú færð að velja hvern þú ætlar að krefja um þessar breytingar næstu fjögur árin og á hvaða grundvelli.“

Tilfinningarnar báru sjónvarpsmanninn næstum ofurliði, en hann er sjálfur innflytjandi frá Bretlandi þó hann hafi fengið bandarískan ríkisborgararétt árið 2019. „Sko ég elska þetta land. Ég er innflytjandi. Ég kaus að koma hingað. Til að vitna í hinn frábæra Lee Greenwood heitinn:  „Ég er stoltur af því að vera Bandaríkjamaður“. Og ég vil meina að það sé ekkert bandarískara en að eiga í góðu og gagnrýnu sambandi við valdhafa, jafnvel þá sem þú kaust yfir þig.“

Oliver telur að með því að hafna Trump núna geti bandaríska þjóðin losna við hann fyrir fullt og allt. „Ég veit að hann myndi setja allt á hliðina áður en hann yfirgefur sviðið, en þegar rykið fellur, þá hefði hann tapað tveimur kosningum í röð og þyrfti næst að standa í kosningabaráttunni 82 ára að aldri. Ég held að hann myndi láta þetta gott heita – og hljómar það ekki vel?“

Sjónvarpsmaðurinn segist fullkomlega meðvitaður um að Trump sé ekki sjálfur stærsta vandamál Bandaríkjanna, heldur einkenni þess. En með því að losna við Trump þá sé kannski hægt að komast að rótum vandans og byrja að greiða úr honum. Hann spurði áhorfendur hvort það hljómi ekki bara vel að búa í heimi þar sem fólki stafi ekki hætta af Trump, í það minnsta vill Oliver búa í slíkum heim: „og ég vona að þið öll gerið það sem í ykkar valdi stendur næstu tvo sólarhringanna til að gera þann heim að raunhæfum möguleika.“