Það var 2020 sem ungir háhyrningar við Íberíuskaga byrjuðu að ráðast á báta og sökkva þeim. Vísindamenn veltu þá fyrir sér hvort um hefndarárásir væri að ræða eða bara leik. En samkvæmt nýju kenningunni þá eru þessir ungu háhyrningar að nota bátana til æfinga, til að æfa sig í veiðum á bláuggatúnfiski í Atlantshafinu. Live Science skýrir frá þessu og segir að þetta komi fram í nýrri rannsókn sem hefur verið birt í vísindaritinu Ocean and Coastal Management.
Aðalhöfundur rannsóknarinnar, Bruno Díaz López, sagði að þegar árásirnar hófust fyrir um fjórum árum hafi vísindamenn séð gott tækifæri til rannsókna því þeir hafi getað fengið siglingafólk til að tilkynna um staðsetningu háhyrninga og þannig séð hvernig þeir dreifast um hafið. Ljóst sé að siglingafólk ljúgi ekki að hvert öðru um þetta því þessar árásir séu alvarlegt vandamál.
Út frá þessum tilkynningum gerðu vísindamennirnir reiknilíkön um ferðir háhyrninganna til að fylla upp í eyður um ferðir þeirra á hinum mismunandi árstímum. Líkönin sýna að sömu umhverfisþættirnir hafa áhrif á háhyrninga og túnfisk. Þetta þýðir að það að vita hvar túnfiskurinn er, veitir góðar upplýsingar um hvar háhyrningar eru. Í ljós kom að háhyrningarnir flytja sig á milli svæða eftir árstíðum og fylgja þar ferðum túnfisksins.
Telja vísindamennirnir því hugsanlegt að háhyrningarnir ráðist á seglbáta til að æfa veiðitækni sína, því þeim mun betri sem þeir séu í að veiða túnfisk, þeim mun minni tíma taki það og þar með hafi þeir meiri frítíma.
