Demókratar í Bandaríkjunum sleikja nú sárin eftir stórsigur Donald Trump í forsetakosningunum. Margir upplifa þetta sem reiðarslag, algjöra falleinkunn og leita nú að sökudólg eða sannfærandi skýringu á því hvers vegna fór sem fór.
Fyrrum forseti fulltrúadeildar Bandaríkjaþings, Nancy Pelosi, bendir á Joe Biden forseta. Þetta sé honum að kenna.
„Hefði forsetinn stigið til hliðar fyrr þá hefðu við getað fengið aðra frambjóðendur að borðinu,“ sagði Pelosi í samtali við The New York Times. „Væntingarnar voru þær að ef forsetinn stigi til hliðar þá færi fram opið prófkjör.“
Pelosi var ein þeirra sem leiddu baráttuna fyrir því að fá Biden til hætta við framboð. Það gekk þó hægt og þegar Biden tók loks ákvörðun þá voru fáir aðrir valkostir í stöðunni en að tefla fram varaforsetanum, Kamala Harris. Jafnvel ef tekin hefði verið ákvörðun um prófkjör, þó tíminn væri naumur, þá varð það útilokað eftir að Biden lýsti strax yfir stuðningi við Harris.
Pelosi tekur fram að líklega hefði Harris staðið sig vel í slíku kjöri, og það hefði styrkt umboð hennar til muna. Það sé þó ómögulegt að fullyrða nokkuð um það.
„Við þurfum nú að lifa með afleiðingunum. Og þar sem forsetinn lýsti strax við stuðningi við Kamala Harris þá var eiginlega ómögulegt að efna til prófkjörs á þeim tíma, ef það hefði gerst fyrr þá hefði staðan verið önnur.“
Pelosi segir við Politico að Biden hefði átt að stíga mun fyrr til hliðar.
„Við héldum úti eins öflugri kosningabaráttu og við gátum, í ljósi þess að Joe Biden var forseti,“ sagði ónefndur aðstoðarmaður við miðilinn. „Joe Biden einn ber ábyrgð á því að Kamala Harris tapaði.“
Annar fyrrum aðstoðarmaður Biden segir þetta þó rangt en hann sagði við fjölmiðla að Harris sé nú að afsaka sig. „Hvernig eyðiru milljarði án þess að vinna?“
Tom Suozzi, þingmaður demókrata í New York, er þó ósammála. Hann segir að stefnumál demókrata hafi fælt kjósendur frá, enda séu allir komnir með nóg af pólitískum rétttrúnaði. Demókratar hafi átt erfitt með að verjast árásum Repúblikana sem vörðuðu umdeild stefnumál, svo sem varðandi trans fólk, varðandi að draga úr fjárveitingum til lögreglu og svo almennt með árásum á gildismat demókrata sem væru ekki nógu „hefðbundið“.
Annar þingmaður demókrata í New York, Ritchie Torres segir að öfga vinstrinu sé um að kenna. Öfgafólk innan demókrata hafi fælt kjósendur frá með misheppnuðu ákalli til minnihlutahópa.
Öldungadeildarþingmaðurinn Bernie Sanders, sem gaf kost á sér sem forsetaefni demókrata 2016 og 2020 en situr nú óháður á þingi, segir að demókratar hafi misst sjónar á markinu. Þeir hafi talað fyrir óbreyttu ástandi á meðan kjósendur kölluðu eftir breytingum.
