Þungunarrofslöggjöfin í Louisiana í Bandaríkjunum var hert enn frekar í síðustu viku þegar ríkisstjórinn, Jeff Landry, skrifaði undir lög sem kveða á um að þungarrofstöflur séu hættuleg lyf.

Þing ríkisins samþykkti lögin á fimmtudaginn og ekki leið á löngu þar til Landry staðfesti þau með undirskrift sinni.

Samkvæmt lögunum er nú refsivert að vera með tvær tegundir þungunarrofstaflna í vörslu sinni án þess að hafa fengið þeim ávísað með lyfseðli.

Politico segir að með þessu sé ætlunin að koma í veg fyrir að íbúar ríkisins kaupi töflurnar á netinu eða í öðrum ríkjum.

Lyfin, sem heita Mifepriston og Misoprostol, eru oft notuð saman til að valda þungunarrofi. En nú eru lyfin sem sagt komin á lista yfir hættuleg lyf í Louisiana.

Ríkið er það fyrsta til að segja þessi lyf á lista yfir hættuleg lyf. Þar er til dæmis fyrir hið mjög svo ávanabindandi lyf Xanax.

Landry tjáði sig um lögin á samfélagsmiðlinum X og sagði það „ekkert annað en hreina skynsemi“ að hann sé nú búinn að staðfesta lögin. „Þessi lög vernda konur í öllu Louisiana og ég er stoltur af að hafa skrifað undir þau,“ segir í færslu hans.

Þungunarrof er nær algjörlega óheimilt í Louisiana, aðeins í sárafáum undantekningartilfellum geta konur fengið heimild til þungunarrofs og því er nær algjörlega útilokað að fá lyfseðil upp á þungunarrofstöflur.

Margra ára fangelsi liggur við því að vera með töflurnar í vörslu sinni án þess að hafa fengið lyfseðil fyrir þeim.