Danir eru duglegir við að leggja peninga til hliðar og hafa verið það síðustu árin. Ekkert lát er á þeirri þróun og í mars jukust innistæður þeirra í dönskum bönkum um sem svarar til 112 milljarða íslenskra króna.

Í heildina eiga Danir sem svarar til um 23. 400 milljarða íslenskra króna á bankabókum sínum. Hafa þeir aldrei átt meira í banka samkvæmt tölum frá seðlabanka landsins.

Frá áramótum hafa innistæðurnar hækkað um sem nemur 175 milljörðum íslenskra króna og á síðustu 12 mánuðum nemur hækkunin sem nemur 1.480 milljörðum íslenskra króna.

Heildarinnistæðan svarar til þess að hver fullorðinn Dani eigi sem nemur um 4,9 milljónum íslenskra króna í banka. En auðvitað er það ekki þannig. Sumir eiga ekki krónu en aðrir háar fjárhæðir.