Í síðustu viku var Iain Packer, 51 árs, fundinn sekur um að hafa myrt Emma Caldwell, sem starfaði sem vændiskona, árið 2005 og að hafa nauðgað rúmlega 20 öðrum konum. Málið hefur vakið mikla athygli í Bretlandi, bæði vegna fjölda fórnarlambanna og vegna þess að lögreglan klúðraði ítrekuðum tækifærum til að hafa hendur í hári hans.

Sky News skýrir frá þessu og segir að afbrotaferill Packer teygi sig aftur til 1999. Fyrir dómi kom fram að hann hafi oft nýtt sér þjónustu vændiskvenna, sem voru háðar fíkniefnum, og hafi lokkað fórnarlömb sín út í afskekktan skóg, um 60 km frá vændishverfinu í Glasgow.

Skapferli Packer er sagt hafa verið eins og hjá „Jekyll and Hyde“, svo miklar voru skapsveiflur hans. Hann er sagður hafa niðurlægt konur með því að krefjast þær að þær afklæddust gegn vilja sínum. Hann taldi þetta hluta af viðskiptum sínum við þær og að þær þyrftu ekki að gefa samþykki sitt.

Hann tók konurnar hálstaki ef þær urðu ekki við kynlífskröfum hans.

Hann varð Emma Caldwell að bana í apríl 2005. Nakið lík hennar fannst í skurði í Limefield skóginum í Suður-Lanarkskíri.

Lögreglan yfirheyrði Packer nokkrum sinnum vegna málsins en hann var ekki handtekinn fyrr en 2022. Skipti þá engu að hann hafði áður játað að hafa ekið Emma út í skóginn sem er frekar afskekktur.

Sky News segir að mörgum árum áður en Packer myrti Emma hafi athygli lögreglunnar verið vakin á hættulegri kynlífshegðun hans.

Ein kona, viðmælandi Sky News, sagðist hafa verið handtekin og látin dúsa í fangaklefa eftir að hafa kært hrottafengna árás Packer.

Aðrar vændiskonur, sem ræddu við Sky News, höfðu svipaðar sögur að segja af samskiptum sínum við lögregluna og segja að ekki hafi verið hlustað á þær, lögreglan hafi verið spillt á þessum tíma og hafi ekkert aðhafst.

Talsmenn lögreglunnar viðurkenna að lögreglan hafi brugðist Emma Caldwell og öðrum fórnarlömbum Packer.