Forsvarsmenn rafbílafyrirtækisins Tesla hafa neyðst til að gera hlé á starfsemi sinni í Þýskalandi eftir að skemmdarvargar gerðu verksmiðju fyrirtækisins skammt frá Berlín óstarfhæfa.

Eldur var borinn að raforkuveri sem sér verksmiðju fyrirtækisins fyrir rafmagni og segir Michael Stuebgen, innanríkisráðherra Þýskalands, að um hafi verið að ræða vísvitandi skemmdarverk sem hefur haft áhrif á þúsundir íbúa í nágrenni svæðisins. CNN greinir frá þessu.

Lögregla er með málið til rannsóknar og segir Michael að málið sé litið mjög alvarlegum augum. Fyrirtækið sendi starfsmenn sína heim eftir að rafmagn fór af.

Verksmiðja Tesla er um 30 kílómetrum suðaustur af Berlín og er hún eina verksmiðja fyrirtækisins í Evrópu. Afkastageta verksmiðjunnar er 375 þúsund ökutæki á ári og því ljóst að um mikla hagsmuni er að ræða fyrir þetta risavaxna fyrirtæki.

Ekki liggur fyrir hvort skemmdarverkið tengist mótmælum umhverfisverndarsinna en þeir hafa mótmælt yfirvofandi stækkun verksmiðjunnar síðustu daga.

Um 80 til 100 aðgerðasinnar hafa hafist við í skógi skammt frá verksmiðjunni og látið til sín taka. Til að stækka verksmiðjuna þyrfti að höggva niður talsverðan fjölda trjáa í nágrenninu og það eru umhverfisverndarsinnar ósáttir við.

Ef af stækkuninni verður gæti afkastageta verksmiðjunnar farið úr 375 þúsund ökutækjum á ári í milljón ökutæki og yrði þá um að ræða stærstu bílaverksmiðju Evrópu.