Ferðasérfræðingurinn Gísli Brynjólfsson deildi heilráðum með Metro um hvað flugfarþegar eiga að forðast að gera á ferðum sínum í háloftunum.
Eitt af því sem hann nefndi er einmitt að ekki á að setja fæturna upp á höfuðpúðann fyrir framan sig. Það er ekki bara dónalegt, það er líka sóðalegt og getur drulla, sýklar og ógeðfelld lykt fylgt þessu. Gísli mælti með því að ef fólk finni fyrir þörf til að teygja úr fótunum, að fara í stutta gönguferð eftir gangi flugvélarinnar.
Annað sem hann nefndi til sögunnar er að ekki á að klappa eftir að vélin er lent en það gera margir, oft eftir flug þar sem töluverð ókyrrð hefur verið í lofti. Gísli benti á að það sé almennt talið saklaust að klappa og það sé einnig leið til að þakka flugmönnunum fyrir að hafa lent örugglega. En það þurfi að hafa í huga að klapp geti haft truflandi áhrif í farþegarýminu, til dæmis á börn og eldra fólk. Af þessum sökum eigi að sleppa því að klappa.
Hvað varðar það hvort dregið eigi að vera fyrir gluggana eða ekki, þá er það góð regla að sá sem situr við gluggann spyrji aðra farþega áður en hann dregur fyrir eða frá glugganum.
Hann benti einnig á að það sé dónalegt að nota raftæki á borð við tölvur og síma án þess að nota heyrnartól. Hávaði geti fylgt þessum tækjum og það séu ekki allir um borð sem vilja heyra hvaða raunveruleikaþætti þú ert að horfa á.
Þegar kemur að því að halla sætisbakinu þá er það góð regla að kíkja aftur fyrir sig til að ganga úr skugga um að farþeginn fyrir aftan sé ekki að nota fartölvu eða borða áður en sætinu er hallað. Það er ekki sérstaklega þægilegt þegar sætinu fyrir framan mann er hallað í öftustu stöðu, óhætt er að segja að það þrengi vel að.
