Jackson var fyrst lagður inn á sjúkrahús í október vegna kviðverkja en ekki löngu síðar kom í ljós að hann var með slæma inflúensusýkingu og lungnabólgu í báðum lungum. Ástand hans hélt áfram að versna og var honum komið fyrir í öndunarvél um tíma.
Valley News fjallar um mál Jacksons en í fréttinni kemur fram að læknar hafi metið stöðuna þannig að til að lifa af þyrfti hann að gangast undir tvöfalda lungnaígræðslu.
Í byrjun janúar síðastliðnum gekkst hann undir aðgerðina og gekk hún ágætlega. Ljóst er að langt og strangt ferli er fram undan hjá Jackson til að ná fyrri styrk.
Í umfjölluninni kemur fram að læknar telji að óhófleg notkun hans á rafsígarettum hafi átt sinn þátt í að ástand hans varð jafn slæmt og raun bar vitni. Lungu hans hafi verið orðin illa farin og illa undir það búin að fá slæma sýkingu eins og gerðist í haust.
„Ég var alltaf að segja honum að hætta að veipa. Hann var alltaf með rafsígarettu. Hann veipaði allan daginn en sagði alltaf að það væri hollara en að reykja sígarettur,“ segir amma hans, Doreen Hurlburt.
Í grein Valley News er rætt við Stephanie Hanson, lækni við Sanford-sjúkrahúsið sem segir að ekki sé nóg vitað um langtíma afleiðingar þess að veipa.
„Þetta er tiltölulega nýtt þannig að langtímaáhrifin eru óþekkt. Í hreinskilni sagt er það dálítið óhugnanlegt,“ segir hún.
