Málið þykir um margt óvenjulegt en þannig er mál með vexti að Roxanne komst í kynni við mann á netinu sem þóttist vera sápuóperustjarnan Thorsten Kaye sem leikur í The Bold and the Beautiful.
Roxanne keypti allt sem hann sagði og lagði meira að segja inn á hann 4.000 Bandaríkjadali, um 550 þúsund krónur, vegna meintra fjárhagsvandræða kappans.
Það sem ýtti Roxanne yfir brúnina voru textaskilaboð frá svikaranum þann 1. desember síðastliðinn þar sem hann sagði: „Þú þarft að losa þig við eiginmanninn, elskan. Ég þarf svo mikið á þér að halda.“
Roxanne svaraði nokkrum klukkustundum síðar og sagðist vera að útbúa súpu fyrir eiginmann sinn með „sérstöku hráefni“. Velti hún fyrir sér hvort hún gæti ekki leyst út líftryggingu eiginmanns síns í kjölfarið.
Eiginmaðurinn, sem er 73 ára, borðaði súpuna en missti meðvitund og veiktist hastarlega. Roxanne hafði sjálf samband við lögreglu og var eiginmanni hennar komið undir læknishendur.
Eiginmaður Roxanne komst til meðvitundar og er á batavegi en ráðabruggið komst upp þegar dóttir þeirra hjóna skoðaði síma móður sinnar og sá skilaboðin sem gengu á milli.
Í frétt NBC kemur fram að Roxanne hafi ekki enn verið ákærð fyrir tilraun til manndráps en hún dvelur nú á heimili sínu með ökklaband.
Hún neitar að hafa ætlað að drepa eiginmann sinn og heldur því fram að súpan sem hún bar á borð fyrir hann hafi verið níu daga gömul. Þess vegna hafi eiginmaður hennar veikst.
Sápuóperustjarnan Thorsen Kaye kom hvergi nálægt málinu og virðist sem um dæmigert netsvindl hafi verið að ræða sem gekk of langt.
