Christopher Gibbons var dæmdur í átta ára fangelsi og Tyrone Patten-Walsh fékk sjö ára dóm. Mennirnir voru stjórnendur hlaðvarpsþáttarins Lone Wolf Radio þar sem þeir þeir dreifðu allskonar hatursáróðri sem beindist meðal annars að samkynhneigðum, múslimum, lituðu fólki og ýmsum minnihlutahópum í Bretlandi.
Mennirnir eru sagðir hafa aðhyllst stefnu nýnasista og sögðu þeir að „kynþætti hvítra yrði líklega útrýmt“ ef ekkert yrði gert. Kölluðu þeir eftir því að hvítir einstaklingar sem ættu í ástarsambandi við fólk af öðrum kynþætti yrðu hengdir. Sagði Gibbons til dæmis að Harry Bretaprins væri réttdræpur fyrir „landráð“ og sonur hans og Meghan Markle, Archie, ætti að hljóta sömu örlög.
Dómarinn í málinu var harðorður í garð þeirra Gibbons og Tyrone. Sagði hann að þó að þeir ættu rétt á því að hafa sínar skoðanir hefðu þeir gengið allt of langt.
Mennirnir voru búnir að gefa út rúmlega tuttugu þætti og höfðu þættirnir verið spilaðir samanlagt um 9.000 sinnum.
