Í borgum á borð við Lahore í Pakistan, Hotan í Kína og Delhi á Indlandi er mikil mengun og loftgæði mjög slæm. En hvað varðar það að skera úr um hvaða borg er sú mengaðasta þá er útilokað að skera úr um það.

Þetta kemur fram í umfjöllun Live Science sem bendir á að þegar gróðureldar brenna geti loftgæðin í borgum á borð við New York, Chicago, San Francisco og Seattle verið þau verstu í heimi. Þetta byggist á rauntímagögnum frá IQAir sem sérhæfir sig í framleiðslu mengunarmæla.

En loftið í þessum borgum er venjulega ekki svona mengað og þá vaknar spurningin um í hvaða borgum loftgæðin eru verst?

Samkvæmt gögnum IQAir þá voru loftgæðin verst í Lahore í Pakistan á síðasta ári. Hotan í Kína fylgdi þar á eftir og því næst úthverfi í Dehli á Indlandi.

2021 voru það þrjár indverskar borgir sem vermdu toppsætin. Höfuðborgin Delhi tróndi á toppnum. Af öðrum höfuðborgum, þar sem mengunin var mikil, má nefna Dhaka í Bangladess og N‘Djamena í Tsjad.