Talið var að Wollemi-furan hefði dáið út fyrir 2 milljónum ára en öllum á óvörum þá fann hópur göngufólks slík tré í Wollemi þjóðgarðinum, sem er um 100 km vesta við Sydney í Ástralíu. Þjóðgarðsverði var gert viðvart og sýndi hann garðyrkjufræðingi tréð. Í kjölfarið var staðfest að þetta væri Wollemi-fura sem hefði í raun verið frosinn í tíma síðan risaeðlurnar gengu um á jörðinni.

Live Science segir að Wollemi-furan (Wollemia nobilis) sé kölluð lifandi-steingervingur af sumum. Hún er næstum algjörlega eins og leifar af slíku tré frá krítartímabilinu, sem var fyrir 145 til 66 milljónum ára.

Aðeins 60 slík tré vaxa villt í náttúrunni og eru þau í hættu vegna gróðurelda sem gjósa öðru hvoru upp á svæðinu.

Nú hafa vísindamenn frá Ástralíu, Bandaríkjunum og Ítalíu lesið genamengi furunnar og þannig varpað ljósi á einstaka þróun hennar og hvernig hún fjölgar sér. Þessi vitneskja kemur að gagni við það verkefni að varðveita tegundina. Rannsóknin hefur verið birt á bioRxiv en hefur ekki verið ritrýnd.

Furan er með 26 litninga sem samanstanda af 12.2 milljörðum basapara. Til samanburðar má nefna að fólk er aðeins með 3 milljarða basapara. En þrátt fyrir þennan mikla fjölda basapara þá er Wollemi-furan mjög fábreytt hvað varðar erfðafræðilega fjölbreytni. Það bendir til að tegundin hafi lent í vanda fyrir 10.000 til 26.000 árum þegar trjánum fækkaði mjög mikið.

Trén skiptast ekki mikið á erfðaefni og virðist sem þau tré sem enn lifa fjölgi sér aðallega með því að klóna sig sjálf.