Ungi maðurinn er 22 ára. Það eru þrjár systur hans og einn bróðir sem eru í gæsluvarðhaldi, grunuð um að hafa lokað manninn inni í kústaskáp.
Lögreglan telur að manninum hafi verið haldið innilokuðum í kústaskápnum vegna kynhneigðar hans. Hér sé um mál að ræða þar sem ættingjar hans töldu kynhneigðina vera fjölskyldunni til skammar.
Caroline Sophia Tarrow, saksóknari, sagði í samtali við Ekstra Bladet að hægt sé að lýsa skápnum sem kústaskáp eða búri án glugga og ljóss. Hafi maðurinn verið með dýnu og fötu til að losa sig við þvag og hægðir í.
Ein af systrunum er grunuð um að hafa slegið manninn með rafmagnssnúru þegar hann hrópaði á hjálp.
Þegar gæsluvarðhaldskrafa lögreglunnar var tekin fyrir hjá dómara vildi aðeins ein af systrunum tjá sig. Hún sagði að innilokaði bróðirinn væri „lauslátur“ og ætti marga kynlífsfélaga.
Þegar hún var handtekin, sagði hún lögreglumönnum að bróðirinn hefði verið lokaður inni því hann væri samkynhneigður. Hún féll frá þessari skýringu þegar gæsluvarðhaldskrafan var tekin fyrir. En það breytir því ekki að lögreglan telur að kynhneigð mannsins hafi valdið því að hann var lokaður inni í skápnum.
