Eflaust dreymir margar um að fara út í geim og ímynda sér kannski hvernig það væri að skjótast aðeins út í geim og heimsækja Alþjóðlegu geimstöðina eða halda til annarra pláneta.
En geimferðalög eru ekki auðveld né hættulaus enda geimurinn vægast sagt fjandsamlegur lífi.
Geimbúningar gera geimförum kleift að fara út úr geimförum sínum í smá tíma. Geimbúningarnir tryggja þeim loft, vatn, þrýsting og þá vernd sem þeir þurfa til að lifa af. En hvað gerist ef einhver fer út úr geimfari án þess að vera í geimbúningi? Um þetta var fjallað nýlega á vef Live Science.
Þar er haft eftir Stefaan de Mey, hjá Evrópsku geimferðastofnuninni, að ef einhver fer út úr geimfari án þess að vera í geimbúningi missi viðkomandi meðvitund eftir 10 til 15 sekúndur vegna súrefnisskorts.
10 til 15 sekúndur eru ekki langur tími en ástæðan fyrir þessum stutta tíma er að fólk myndi ekki vilja halda niðri í sér andanum þegar það skýst út í geiminn úr geimfari. Í hinum tóma geimi myndi súrefnið valda alvarlegum vandræðum.
„Súrefnið myndi byrja að þenjast út og rífa lungun í sundur og það myndi valda því að blóðið myndi sjóða og bobla sem myndi samstundis valda blóðtappa og verða viðkomandi að bana,“ sagði de Mey.
Það þarf því að reyna að losna við eins mikið loft úr lungunum og hægt er, áður en farið er út í geiminn án geimbúnings.
Þess utan veldur þrýstingsskortur öðrum þáttum sem einnig eru banvænir. Líkamsvökvar á borð við munnvatn og tár byrja að sjóða. Mannslíkami myndi einnig þenjast út en húðin er nægilega teygjanleg til að takast á við þrýstingsbreytinguna að sögn de Mey sem bætti því við að hryllingssögur í kvikmyndum, þar sem fólk springur, séu ekki réttar.
Í besta falli hefur fólk nokkrar sekúndur áður en súrefnið í blóði þess er uppurið en þá missir það meðvitund. Innan nokkurra mínútna deyr heilinn og þar með er sagan öll.
