Það endaði ekki vel hjá 32 ára konu sem ætlaði að stela bjór úr sjoppu á lestarstöðinni í Árósum í Danmörku á sunnudagskvöldið. Snarráður verslunarmaður sá hvað konan var að gera og brást hratt við.

Verslunarmaðurinn læsti einfaldlega útidyrunum svo konan gæti ekki yfirgefið sjoppuna án þess að greiða fyrir bjórinn.

Þetta fór ekki vel í konuna sem reiddist mjög og braut glerið í útidyrahurðinni og hafði í hótunum við starfsmanninn.

En það hafði lítið að segja því starfsmaðurinn haggaðist ekki.

Þegar lögreglan kom á vettvang sáu lögreglumennirnir þegar konan kastaði sígarettu í starfsmanninn og hellti bjór yfir hann.

Hún var handtekin, grunuð um rán.