Emilie Meng hvarf sumarið 2016. Hún var numin á brott og myrt eftir að hafa verið beitt kynferðislegu ofbeldi. Lík hennar fannst í vatni á aðfangadag 2016, töluvert frá staðnum þar sem hún var numin á brott.
32 ára maður situr nú í gæsluvarðhaldi vegna málsins og fleiri mála en hann var handtekinn fyrir nokkrum vikum eftir að hann nam 14 ára stúlku á brott og hélt fanginni í um sólarhring. Á þeim tíma nauðgaði hann henni ítrekað. Lögreglan fann stúlkuna á lífi heima hjá manninum. Í kjölfarið vaknaði grunur um að hann hefði komið við sögu í máli Emilie Meng.
TV2 skýrir frá því að vitni hafi gefið sig fram við lögregluna 2017 og sagst hafa séð ljósan bíl, af millistærð, við Regnemarks Bakke nokkrum klukkustundum eftir að Emilie Meng hvarf. Það var þar sem lík hennar fannst á aðfangadag.
Lögreglan hefur sagt að þessi vitnisburður sé „trúverðugur“ og gæti tengst morðinu á Emilie Meng. Vitnið sagði að afturhleri bifreiðarinnar hafi verið opinn og að maður hafi staðið með framréttar hendur og haldið á einhverju þungu. Vitnið sagði lögreglunni einnig að bókstafirnir á skráningarnúmeri bifreiðarinnar hafi verið „BD“.
Hinn grunaði átti á þessum tíma silfurgráa Hyundai i30 með skráningarnúmeri sem byrjaði á „BB“. Seinni bókstafurinn ekki sá sami og vitnið skýrði frá.
„Þegar ég heyri þetta, þá sýnist mér að það hefði átt að vera hægt að þrengja hringinn um þá sem tengdust þessum bíl miklu meira en lögerglan hefur skýrt frá,“ sagði Mai-Brit Storm Thygesen, lögmaður fjölskyldu Emilie Meng, í samtali við TV2.
Þegar vitnið gaf sig fram við lögregluna var sá sem nú er grunaður á meðal þeirra 2.140 eigenda Hyundai i30 sem lögreglan beindi sjónum sínum að. Sá fjöldi bifreiða var óháður lit þeirra eða skráningarnúmeri. Það hefði því verið hægt að þrengja hringinn mjög mikið ef lögreglan hefði beint sjónum sínum að bílum með skráningarnúmer sem byrja á „B“.
Hvorki vitnið né lögreglan vildu tjá sig um málið þegar TV2 leitaði eftir því.