Niðurstöður nýrrar rannsóknar sýna að loftslagsbreytingarnar geta valdið risastórum jarðvegsskriðum undir sjávarborði og þær geta myndað risastórar flóðbylgjur. Live Science skýrir frá þessu.
Fram kemur að vísindamenn hafi borað mörg hundruð metra niður í botnlögin undir sjávarborðinu við Suðurskautið og hafi þá komið í ljós að á fyrri hlýnunarskeiðum, fyrir 3 til 15 milljónum ára, hafi laus jarðlög myndast og runnið af stað og valdið risastórum flóðbylgjum sem hafi náð til stranda Suður-Ameríku, Nýja-Sjálands og Suðaustur-Asíu.
Sjórinn hlýnar samhliða loftslagsbreytingunum og telja vísindamenn að það geti valdið því að risaflóðbylgjur myndist aftur á þessum slóðum. Rannsókn þeirra var nýlega birt í vísindaritinu Nature Communications.
Skriður neðansjávar eru mjög hættulegar og geta valdið flóðbylgjum sem geta orðið mörgum að bana sagði Jenny Gales, hjá University of Plymouth, í fréttatilkynningu. Hún sagði að rannsókn hennar og samstarfsfólks sýni vel að við verðum að auka skilning okkar á hvaða áhrif loftslagsbreytingarnar geta haft á jafnvægið í hinum ýmsu heimshlutum og hættunni á flóðbylgjum í framtíðinni.
