Ef þú hefur séð kvikmyndina „Groundhog Day“ þá manstu að aðalpersónan upplifði sama daginn hvað eftir annað. Þegar hann vaknaði á morgnana tók sami dagurinn við og daginn áður. Hann var sá eini sem upplifði þetta og vissi af þessu.

Það var eitthvað í þessa veru sem fór að gerast hjá manni á níræðisaldri. Honum fannst hann upplifa sömu atburðina aftur og aftur.

Skýrt er frá málinu í vísindaritinu BMJ Case Reports. Þar kemur fram að maðurinn hafi meðal annars kvartað undan rafbók, sem hann var að lesa, því hann taldi hana alltaf sýna honum sama innihaldið. Hann setti sig einnig í samband við sjónvarpsvirkja því sjónvarpið hans sýndi honum alltaf sömu fréttirnar að því að hann taldi.

Þegar maðurinn var beðinn um að lýsa upplifun sinni með eigin orðum, sagði hann: „Hvert sem ég fer, er sama fólkið sömu megin við götuna, sömu bílarnir fyrir aftan mig og sama fólkið í þeim . . . sama fólkið fer út úr bílunum í sömu fötunum, með sömu pokana, segir sömu hlutina . . . ekkert er nýtt.“

Í umfjöllun BMJ kemur fram að líklega megi rekja þetta til sjaldgæfrar útgáfu af Alzheimerssjúkdómnum. Einkenni af þessu tagi koma stundum fram hjá fólki sem þjáist af taugasjúkdómum á borð við Alzheimers að því er segir í umfjölluninni í BMJ.