Skila átti bókinni „A History of the United States“ á bókasafn eitt í Kaliforníu í síðasta lagi þann 21. febrúar 1927. En lántakandinn skilaði henni ekki á tilsettum tíma. En nýlega birtist dularfullur maður á safninu og skilaði bókinni.

Sky News segir að starfsfólk St Helena bókasafnsins hafi verið mjög hissa þegar maðurinn kom og skilaði bókinni, 96 árum of seint. Hún er eftir bandaríska sagnfræðinginn Benson Lossing og er talið að hún hafi verið gefin út 1881.

Skilvísi maðurinn gaf ekki upp neinar upplýsingar um sig áður en hann yfirgaf safnið.

Hann þurfti þó ekki að óttast að vera krafinn um sekt því safnið hætti að krefja lántakendur um greiðslu, fyrir að skila bókum of seint, fyrir fjórum árum. Ef sektargreiðslur hefðu enn verið við lýði hefði sektin verið 1.756 dollarar.

Inni í bókinni var upphaflegi lánsmiðinn þar sem fram kemur að hafa megi bókina að láni í tvær vikur og að greiða þurfi fyrir skemmdir á henni eða ef hún glatast.

Starfsfólk bókasafnsins vonast til að geta haft uppi á manninum til að öðlast vitneskju um hvernig hann komst yfir bókina.