Sextán ára gömul stúlka var stungin og barin til bana í mannmörgu húsasundi í höfuðborg Indlands, New-Dehli, í gær.
Í frétt CNN af málinu segir að morðið hafi á ný vakið reiði og hneykslan meðal almennings vegna ofbeldis karlmanna í garð kvenna í landinu.
Morðið náðist á upptöku öryggismyndavélar og á henni má sjá fjölda fólks á gangi nærri morðingjanum og fórnarlambinu.
Aðeins einn maður reyndi að koma stúlkunni til bjargar en án árangurs.
Samkvæmt því sem lögreglan segir benda fyrstu vísbendingar til að um sé að ræða svokallaðan ástríðuglæp.
Í frétt CNN kemur fram að indverskur fjölmiðill hafi rætt við föður stúlkunnar sem krefjist harðrar refsingar fyrir morðingjann.
Þetta morð er það nýjasta í röð morða og nauðgana á konum sem hafa flest vakið mikla reiði og kallað fram háværar spurningar um hvort nægilega mikið sé gert til að vernda indverskar konur og refsa árásarmönnum.
Swati Maliwal, formaður kvennasamtaka Dehli, segir þennan atburð þann grimmilegasta sem hún hafi nokkurn tímann séð.
Tíðni ofbeldis gegn konum óx um tuttugu prósent á Indlandi á árunum 2013 til 2020.
Samtök fólks sem berjast fyrir umbótum í málum sem snúa að ofbeldi gegn konum segja að tíðnin sé mjög líklega í raun hærri þar sem mörg ofbeldisbrot, sérstaklega nauðganir, séu ekki tilkynnt.
Skýringa á hárri tíðni ofbeldis gegn konum á Indlandi er helst leitað í gömlum samfélagslegum hugmyndum um yfirráð karla yfir konum. Segir baráttufólk að ekki dugi að fjölga öryggismyndavélum og auka löggæslu á götum úti. Það verði að breyta hugarfari karlmanna og drengja.