Samkvæmt frétt Vísis var íslensk kona, um fimmtugt, flutt alvarlega særð á sjúkrahús eftir að hafa verið stungin með hníf síðasta laugardag í húsi í Lundi í suðurhluta Svíþjóðar. Maður sem er 45 ára gamall og tengist konunni var handtekinn í nágrenninu, grunaður um árásina, en síðar sleppt.
Vísir vitnar í frétt sænska ríkissjónvarpsins, SVT, af málinu og segir þar koma fram að saksóknari hafi ákveðið, eftir nánari rannsókn, að fara ekki fram á gæsluvarðhald yfir manninum. Lögreglan er að sögn ekki tilbúin til að greina nánar frá tengslum mannsins og konunnar en í frétt Vísis er maðurinn sagður enn grunaður um tilraun til manndráps.
Í frétt SVT, sem Vísir vitnar til, sem hefur verið uppfærð segir hins vegar saksóknarinn, Josefin Sävlund, að við rannsókn málsins hafi komið í ljós upplýsingar sem gert hafi það að verkum að maðurinn sé ekki lengur grunaður um neitt saknæmt. Hún tjáði sig ekki um hvort einhver annar aðili er grunaður um hnífsstunguárásina.