Það var dómstóll í Kaupmannahöfn sem kvað dóminn upp. Ekstra Bladet segir að Fatih Kaplan hafi verið dæmdur í 11 ára fangelsi en Benjamin Khonson í 9 ára fangelsi. Þeir áfrýjuðu dómnum samstundis.
Í dómsniðurstöðu kemur fram að sannað þyki að þeir hafi verið með sex skammbyssur í vörslu sinni, gas- og merkjabyssu, hálfsjálfvirkan riffil og vélbyssu. Þetta geymdu þeir í íbúð í Ballerup.
Auk vopnanna voru þeir með tvo hljóðdeyfa og mikið magn skotfæra.
Vopnin tilheyrðu glæpagenginu LTF, sem er bannað í Danmörku, en hvorugur mannanna tengist því beint.
Dómstólinn komst einnig að þeirri niðurstöðu að íbúðin hefði gegnt hlutverki fíkniefnamiðstöðvar þar sem kókaíni var pakkað. Þar fundust umbúðir utan af að minnsta kosti sjö kílóum af kókaíni.
Áður höfðu þeir Raza Ali Bashir og Harmanzi Dede verið dæmdir í 10 ára fangelsi fyrir þeirra hlut í vörslu vopnanna og umsýslu með mikið magn kókaíns. Þeir játuðu sök og áfrýjuðu ekki dómum sínum. Þeir voru báðir félagar í LTF.
