En svo virðist sem einn af ríkustu mönnum heims hafi látist án þess að nokkur hafi veitt því athygli, nema bandarísk skattyfirvöld.
Eftir því sem Quarts segir þá birti bandaríska fjármálaráðuneytið, US Treasury, lista yfir fjárstreymi ríkisins þann 27. febrúar eins og það gerir daglega. En ein færsla vakti sérstaka athygli þennan dag því hún var upp á 7 milljarða dollara.
Þessi greiðsla var undir skattaflokknum „eigna- og erfðaskattar“.
Þetta er hæsta greiðslan í þessum flokki síðan 2005.
Persónuverndarreglur koma í veg fyrir að skattyfirvöld geti birt frekari upplýsingar um frá hverjum þessi greiðsla kom.
Miðað við að 7 milljarðar dollara, það svarar til rúmlega 950 milljarða íslenskra króna, hafi verið greiddar í erfðaskatt þá þýðir að eignir viðkomandi voru að minnsta kosti 35 milljarðar dollara og er það varfærið mat að sögn Quartz.
Ef stuðst er við varfærnasta matið þá dugir það eitt og sér til að koma viðkomandi á lista yfir 50 ríkustu einstaklinga heims.
„Þetta er annað hvort mjög ríkur einstaklingur sem Forbes hefur yfirsést eða greiðsla, sem hefur dregist, frá milljarðamæringi sem lést fyrir mörgum árum,“ sagði Gabrial Zucman, hagfræðingur við University of Berkeley, í samtali við Quartz.
Listi Forbes yfir milljarðamæringa, sem létust á síðasta ári, nær ekki yfir neinn sem var svo auðugur að erfðaskatturinn væri svona hár.
Giskað hefur verið á að þetta hafi verið erfðaskattur eftir milljarðamæringinn Sheldon Adelson sem lést 2021. Hann var á lista Forbes yfir milljarðamæringa það árið.
Hann auðgaðist á fasteignaviðskiptum í Las Vegas og spilavítarekstri. Auður hans var metinn á 35 milljarða dollara.
