Hinn vellauðugi nígeríski stjórnmálamaður Ike Ekweremadu, eiginkona hans Beatrice og læknir þeirra, Obina Obeta hafa verið sakfelld í Bretlandi fyrir mansal. Málið hefur vakið nokkra athygli ytra enda var líffæraþjófnaður lokatakmark þremenninganna.
Dóttir Ekweremadu-hjónanna, Sonia, stundaði nám við háskóla í Newcastle eins og fleiri börn þeirra. Í desember 2019 veiktist Sonia alvarlega og í ljós kom að hún þyrfti á nýrnaigræðslu að halda. Biðlistar eftir slíku úrræði eru gríðarlega langir og óvíst var hvort Sonia myndi hafa biðina af.
Foreldrar hennar gripu þá til sinna ráða og leituðu logandi ljósi að heppilegum líffæragjafa í heimalandi. Að lokum fannst ungur fátækur maður sem seldi símafylgihluti upp úr hjólabörum á markaði í Lagos, höfuðborg Nígeríu, og hann reyndist uppfylla öll skilyrði eftir rannsóknir. Fékk hann loforð um háa greiðslu á hans mælikvarða, rúmlega 300 þúsund krónur, og loforð um bjarta framtíð á Bretlandseyjum þar sem hann gæti stutt við fjölskyldu sína í Nígeríu.
Því var komið í kring að maðurinn var sendur til London og var hann sagður vera frændi Ekweremadu-hjónanna sem ætlaði að færa frænku sinni lífsbjörg, með nýju nýra. Þá nutu hjónin aðstoðar læknisins Obina Obeta sem starfaði í London.
Að endingu gekk áætlunin ekki upp því ráðgjafar við tvö sjúkrahús í Bretlandi komust að því að líffæragjafinn hafði ekki verið upplýstur um áhættur aðgerðarinnar og að auki hefði hann ekki fjárhagslega burði til þess að standa undir þeim kostnaði við umönnunun sem hann þyrfti út ævina eftir aðgerðina.
Líffæragjafinn áttaði sig svo á því að maðkur væri í mysunni og flúði úr aðstæðunum. Eftir að hafa hafist við á götunni í þrjá daga gekk hann loks inn á lögreglustöð þar sem hann brotnaði niður og sagði lögreglumönnum allt að létta. Sagði hann hópinn á bak við áætlunina hafa komið fram við sig eins og þræl og blekkt sig til þess að fljúga til Bretlands.
Að lokum voru öll fjögur ákærð, Ekwermadu-hjónin, Sonia dóttir þeirra og læknirinn Obeta. Fyrir dómi var meðal annars sýnt fram á það að hjónin hafi ekki viljað leita að nýrnagjafa innan fjölskyldunnar heldur frekar viljað að einhver ókunnugur þeim myndi sitja uppi með áhættuna af aðgerðinni.
Ekweremadu-hjónin og læknirinn voru að endingu sakfelld fyrir aðild sína að málinu en dóttirin Sonia var sýknuð. Hin sakfelldu eiga yfir höfði sér allt að 10 ára dóm vegna málsins.